2026-njy ýylyň iýul aýynda Şanhaýyň ýokary tehnologiýaly Žanszýan sebitinde meýdany 5000 inedördül metrlik innowasion tälim merkezi açylar. Bu merkez dürli öndürijileriň robotlaryny bilelikde okatmak we türgenleşdirmek üçin niýetlenendir.
New Atlas neşiriniň berýän maglumatyna görä, taslamanyň maksady, ynsanpisint robotlaryň senagat, lukmançylyk we öý hojalygy pudaklaryna ornaşdyrylmagyny tizleşdirmek üçin ägirt uly amaly maglumatlar binýadyny ýygnamakdan ybaratdyr.
Merkeziň ilkinji okuw tapgyryna Hytaýyň on sany öňdebaryjy tehnologiýa kompaniýasynyň 100-den gowrak gumanoid roboty kabul edildi.
Okatmak maksatnamasy türgenleşdirijiniň (adamyň) dilden berýän buýruklaryny robotlaryň özbaşdak ýerine ýetirmegine esaslanýar. Androidler 45 sany esasy başlangyç endigi, şol sanda goşlary galdyrmagy, tutmagy, ýerleşdirmegi we daşamagy kämilleşdirip, awtomat derejesine ýetirmelidirler. Tälim meýilnamasyna 10 sany çylşyrymly ugur, şol sanda otaglary arassalamak, harytlary tekjelere düzmek we geýim-gejimleri eplemek ýaly işler girizildi. Bu amal ýokary ünsi talap edýär, şonuň üçin alymlar bir hereketiň ýerine ýetirilişine günde 600 gezege çenli gözegçilik etmeli bolarlar.
Merkeziň baş wezipesi kämil sanly modeli kemala getirmek üçin her gün takmynan 50 müň maglumat nokadyny döretmekden ybaratdyr. Bu bolsa ýylda 10 million birlik okuw maglumatyny üpjün eder.
Bu meýdançanyň baş müdiri Sýu Bin:
— Biz bu merkezi maglumatlaryň uly göwrümli çalşygyny we olaryň bilelikde ulanylmagyny üpjün etmek üçin döretdik. Bu bolsa tutuş robot önümçiligine güýçli itergi berer — diýmek bilen, taslamanyň öňde goýan maksatlaryny düşündirýär.
Öndürijiler öz robotlaryny belli bir kärlere tiz uýgunlaşdyrmak üçin bu umumy maglumatlar bazasyndan mugt peýdalanyp bilerler.
