Google kompaniýasy Apple bilen hyzmatdaşlyk baradaky ylalaşygyny tassyklady. Bu hyzmatdaşlygyň çäginde Gemini tehnologiýalary Apple Intelligence-iň geljekki funksiýalarynyň, ilkinji nobatda bolsa Siri-niň täzelenen wersiýasynyň işini üpjün etmek üçin ulanylar.
Bu hyzmatdaşlyk barada Google Cloud-yň ýolbaşçysy Tomas Kurian Las-Wegasda geçirilen «Google Cloud Next 2026» maslahatynda gürrüň berdi. Onuň aýtmagyna görä, Google täze nesil modellerini işläp düzmekde Apple üçin iň amatly bulut prowaýderi hökmünde çykyş edýär.
Bu modelleriň Siri-niň has personallaşdyrylan wersiýasynyň esasyny düzjekdigi bellenilýär. Täze Siri-ni 2026-njy ýylda işe girizilmek meýilleşdirilýär.
Mundan ozal Apple täzelenen Siri-niň çykarylyşyny yza süýşürýändigi barada habar beripdi. 2025-nji ýylyň martynda kompaniýa bu funksiýanyň «geljek ýylda» peýda boljakdygyny aýdypdy, soňra bolsa onuň 2026-njy ýylda çykaryljakdygyny takyklady. 2026-njy ýylyň fewralynda bolsa Apple bu meýilnamalaryň güýjünde galýandygyny ýene bir gezek tassyklady.
Siri — Apple kompaniýasynyň iOS, macOS, watchOS we tvOS ulgamlaryna gurlan sesli kömekçisidir. Ol dürli wezipeleri sesli buýruklar arkaly ýerine ýetirmäge mümkinçilik berýär, emma soňky ýyllarda öz funksionallygy boýunça bäsdeşlerinden yza galyp gelýärdi. Täze emeli aň tehnologiýalarynyň ornaşdyrylmagy bilen bu ýagdaýyň düýpli üýtgemegine garaşylýar.
