Ýandeks kompaniýasy «Alisa AI» goşundysyny we onuň web-wersiýasyny görmekden mahrum, şeýle-de görüşi ýabygorly bolan ulanyjylar üçin amatly ýagdaýa getirdi. Indi bu hyzmat ekranly okaýjy (skrinrider) programmalary bilen bilelikde işleýär we ekrandaky maglumatlary sesli yglan etmäge ýa-da braýl ekranyna çykarmaga mümkinçilik berýär.
Häzirki wagtda kompaniýanyň 16 sany hyzmaty, şol sanda «Alisa AI» bilen söhbetdeşlik funksiýasy hem ýöriteleşdirildi. Goşundynyň we web-wersiýanyň gurluşyna klawiatura arkaly gözleg etmegi ýeňilleşdirýän ýörite bellikler goşuldy.
«Alisa AI» dürli meseleleri çözmäge: tekstleri düzmäge we redaktirlemäge, tagam taýýarlaýyş reseptlerini tapyp bermäge, film boýunça maslahatlary hödürlemäge we harytlaryň bahalaryny deňeşdirmäge ukyplydyr.
Täzelenen nusga Android, iOS ulgamlarynda we web-wersiýada elýeterlidir. Hyzmat «Alice AI» maşgalasyna degişli generatiw modelleriň binýadynda işleýär. Çat bilen alice.yandex.ru saýtyndan, şeýle-de «Alisa AI», «Ýandeks Brauzer» we «Ýandeks bilen Alisa AI» goşundylaryndan peýdalanyp bilersiňiz.
