Arkadag şäherine amala aşyran iş saparynyň dowamynda Türkmenistanyň Halk Maslahatynyň Başlygy Gurbanguly Berdimuhamedow şäheriň gurluşygynyň ikinji tapgyrynyň çäklerinde gurulmagy meýilleşdirilýän önümçilik we durmuş maksatly desgalaryň şekil taslamalary bilen tanyşdy.
Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy Derýageldi Orazow we häkim Gülşat Mämmedowa hasabatlar bilen çykyş etdi. Taslamalaryň ozal berlen maslahatlary nazarda tutmak bilen taýýarlanandygy bellenildi.
Bu ýerde desgalaryň, şol sanda Arkadag merkeziniň binasynyň içki bezeg serişdeleri, iş otaglarynyň enjamlaşdyrylyşy we binalaryň, hususan-da, Gün elektrik bekediniň ýerleşjek ýerleriniň çyzgylary hödürlendi.
Gurbanguly Berdimuhamedow taslamalar bilen tanşyp, desgalaryň bezeg işleri boýunça birnäçe bellikleri aýtdy we binagärligiň milli däpleriniň innowasion çözgütler bilen utgaşdyrylmagynyň möhümdigini nygtady. Binalaryň agşamky görnüşlerini has-da gözelleşdirmek üçin yşyklandyryş ulgamlaryny kämilleşdirmek tabşyryldy. Şeýle hem şäheriň edara ediş desgalarynda, şol sanda duşuşyklar geçirilýän zallarda we köpçülikleýin habar beriş serişdeleriniň wekilleri üçin iş zolaklarynda zerur şertleriň döredilmeginiň zerurdygy bellenildi.
