Ýewropanyň iň iri awiakompaniýasy bolan «Lufthansa» ýangyç sarp edilişini azaltmak maksady bilen, iýun aýyndan oktýabr aýyna çenli, takmynan 20 müň uçuşyň ýatyrylýandygyny yglan etdi. Bu barada Deutsche Welle neşiri kompaniýanyň beýanatyna salgylanyp habar berýär.
Kompaniýanyň maglumatlaryna görä, bu çäre 40 müň tonnadan gowrak awiasiýa ýangyjyny tygşytlamaga mümkinçilik berer we işiň umumy netijeliligine düýpli täsir etmez.
«Lufthansa» Frankfurt-na-Maýne we Mýunhen ugurlaryndaky girdejisi az bolan gatnawlaryň ýatyryljakdygyny, şol bir wagtyň özünde Sýurih, Wena we Brýussel ugurlaryndaky uçuşlaryň köpeldiljekdigini düşündirdi. Şeýle-de, Rim şäherine we Rime tarap amala aşyrylýan gatnawlaryň sany hem azaldylar. Ýatyrylan ugurlaryň doly sanawyny aprel aýynyň ahyrynda mälim etmek meýilleşdirilýär.
Ýangyç ýetmezçiligi sebäpli beýleki awigatnadyjylar hem meňzeş çäreleri görýärler. Şwedleriň «SAS Scandinavian Airlines» kompaniýasy aprel aýynda müňe golaý uçuşy ýatyrandygyny habar berdi. «Air France-KLM» topary bolsa uzak aralyga uçuşlar üçin ýangyç tölegini 100 ýewro deňiç ýokarlandyrdy.
Awiasiýa ýangyjynyň ýetmezçiligi Ýakyn Gündogardaky ýagdaýlar bilen baglylykda ýüze çykdy. 17-nji aprelde nemes awiakompaniýalary häkimiýetlere ýüz tutup, ýangyç gorlaryny artdyrmak üçin strategiki kerosin gorlaryny ulanmaga we NATO-nyň turba geçirijiler ulgamyna rugsat bermäge çagyrdylar.
Halkara energetika agentliginiň başlygy Fatih Birol 16-njy aprelde beren beýanatynda, Ýewropadaky awiasiýa ýangyç gorlarynyň, takmynan alty hepdä üçin ýetjekdigini aýtdy. Ol Ýakyn Gündogardaky ýagdaý tiz wagtda durnuklaşmadyk halatynda, awiakompaniýalaryň uçuşlary köpçülikleýin ýatyrmaly boljakdygyny duýdurdy.
