Saud Arabystanynda «Haj—2026» möwsümini geçirmegiň täze düzgünleri güýje girdi. Hökümet tarapyndan tassyklanan täze düzgünlere görä, 13-nji aprelden başlap, Mekge şäherine girmäge diňe ýörite ygtyýarnamasy bolan adamlara rugsat berilýär.
Şähere girmäge diňe Mekgede ýaşaýandygy barada resminamalary bolan şahslara, haj parzyny berjaý etmek üçin resmi rugsatnamasy bar bolanlara, şeýle hem Tasrih, Absher Afrad we Bawaba Muqim platformalary arkaly berlen işlemek üçin ýörite elektron rugsatnamalary bolan işgärlere rugsat berilýär.
18-nji aprelden başlap, gönüden-göni haj üçin niýetlenen wizalardan başga, wizalaryň ähli görnüşine eýe bolan şahslar üçin Mekgä girmek we onda bolmak doly gadagan edildi. Şol bir wagtda — 18-nji aprelden 31-nji maý aralygynda — umra (kiçi haj) zyýaratyny amala aşyrmak üçin rugsatnamalary bermek wagtlaýyn togtadylýar. Şäherde umra wizasy bilen bolan zyýaratçylar görkezilen möhlete çenli Mekgeden çykmaga borçly edildi.
Haj möwsüminde bellenen talaplaryň bozulandygy üçin berk çäreler göz öňünde tutuldy. Düzgünleri bozan ýa-da olaryň bozulmagyna ýardam eden şahslara 20 müň saud rialyna çenli (takmynan, 5,5 müň dollar) jerime salnyp bilner.
18-nji aprel — 31-nji maý aralygynda rugsat berilmedik zyýaratçylary bikanun gatnatmak, gizlemek ýa-da ýardam bermek üçin 100 müň saud rialyna çenli (takmynan, 26,5 müň dollar) jerime bellenildi.
Pul jerimelerinden başga-da, düzgün bozanlara Patyşalykdan deportasiýa edilmek we 10 ýyl möhlet bilen ýurda girmegi gadagan etmek garaşýar, bikanun gatnawlarda ulanylan ulag serişdeleri bolsa döwlet haýryna geçiriler.
