Tbiliside 70 gatly Trump Tower gökdirän binasynyň gurluşygy meýilleşdirilýär. Ýurtda iň beýik bina boljak bu taslamany amala aşyrmak meýli barada ABŞ-nyň Prezidenti Donald Trampyň maşgalasyna degişli bolan The Trump Organization habar berdi.
«Paper Kartuli» neşiriniň maglumatyna görä, binany Saburtalo sebitindäki öňki aýlawyň çäginde, Merkezi seýilgähiň golaýynda gurmak göz öňünde tutulýar. Toplumyň köp ugurly häsiýete eýe boljakdygy we onda ýokary derejeli ýaşaýyş jaýlarynyň, söwda meýdançalarynyň, restoranlaryň hem-de hyzmat ediş nokatlarynyň ýerleşjekdigi bellenilýär.
Gökdirän binanyň taslamasyny dünýäniň iň iri binagärlik kompaniýasy hasaplanýan Gensler binagärlik býurosy işläp taýýarlar. Gurluşyga Gruziýanyň kompaniýalary, şol sanda ýurduň iň uly gurluşykçylarynyň biri bolan Archi hem gatnaşar.
The Trump Organization kompaniýasynyň ýerine ýetiriji wise-prezidenti Erik Tramp taslamanyň kompaniýanyň ýokary standartlaryna laýyklykda amala aşyryljakdygyny belledi.
Trump Tower ady eýýäm Nýu-Ýorkdaky The Trump Organization-yň ştab-kwartirasy ýerleşýän 58 gatly bina üçin ulanylýar. Şol brend bilen dünýäniň dürli şäherlerinde, meselem, Stambulda we Bakuwda hem gökdirän binalar gurlupdy.
