Gazagystanda 3-nji sentýabrda Gazak tazysynyň we tobetiniň güni belleniler. Degişli goşmaçalar ýurduň hökümeti tarapyndan çap edilen «Baýramçylyk seneleriniň sanawyny tassyklamak hakyndaky» Karara girizildi.
Bu senäniň saýlanyp alynmagy tötänleýin däl. 2024-nji ýylyň 3-nji sentýabrynda Halkara kinologiýa federasiýasy (FCI) gazak tazysyny resmi tohum hökmünde deslapky ykrar etmek barada çözgüt kabul etdi we Gazagystanyň tohum standartyny saklaýjy statusyny berkitdi. Bu ädim tohumyň halkara derejesinde doly ykrar edilmeginiň öňündäki esasy tapgyr hasaplanýar.
Tazy — awçy itleriniň bir görnüşi, gündogar tazysy. Tobet bolsa Aziýanyň çopan itiniň gadymy adydyr. Itleriň bu tohumlary gazak halky üçin uly medeni ähmiýete eýedir. Gazagystanyň Ekologiýa ministrliginde şeýle günüň döredilmeginiň milli mirasy gorap saklamaga we wagyz etmäge gönükdirilendigi bellenildi.
Edarada bu başlangyjyň amaly tarapyna hem üns çekilýär. Kinologiýanyň we oňa degişli ugurlaryň ösdürilmegi täze iş orunlarynyň döredilmegine hem-de salgyt tölegleriniň artmagyna ýardam edip biler.
Baýramçylygy bu tohumlaryň taryhyna, aýratynlyklaryna we olara ideg edilişine bagyşlanan leksiýalar, seminarlar, sergiler we beýleki çäreler bilen utgaşdyryp geçirmek meýilleşdirilýär.
