Türkmenistanyň bilim ministriniň orunbasary Azat Ataýew Huawei kompaniýasynyň Merkezi Aziýa boýunça wise-prezidenti Sýu Haý bilen duşuşyp, sanly bilimi ösdürmek we emeli aň (EA) tehnologiýalaryny ornaşdyrmak meselelerini ara alyp maslahatlaşdy.
Duşuşygyň esasy netijesi hökmünde emeli aň ulgamyndaky bilim maglumatlaryny ýerli şertlere uýgunlaşdyrmak we Türkmenistanda Huawei ICT Academy — halkara sertifikatly hünärmenleri taýýarlamagyň toplumlaýyn modelini döretmek baradaky Ähtnamany taýýarlamak boýunça deslapky ylalaşyklar gazanyldy.
Duşuşykda bilim infrastrukturasyny döwrebaplaşdyrmak we ýokary okuw mekdepleri üçin täze çözgütleri ornaşdyrmak meselelerine aýratyn üns berildi. Hususan-da, türkmen talyplaryna bilim almaga we HCIA, HCIP hem-de HCIE derejeli halkara sertifikatlaryny almaga mümkinçilik berjek synag wauçerlerini bermek meseleleri maslahatlaşyldy. Bu programmalar bulut tehnologiýalaryndan we kiberhowpsuzlykdan başlap, maglumat seljermesine çenli uly isleg bildirilýän ugurlary öz içine alýar.
Şeýle hem Türkmenistanyň ýokary okuw mekdeplerine Huawei kompaniýasynyň okuw kurslaryna elýeterlilik bermek we mugallymlaryň halkara akademik programmalaryna gatnaşygyny giňeltmek barada ylalaşyk gazanyldy.
Mundan başga-da, talyplaryň «ICT Competition» bäsleşigine gatnaşmagynyň ähmiýeti aýratyn bellenildi. Mälim bolşy ýaly, Türkmenistanyň milli topary bu bäsleşikde mundan ozal hem ýokary netijeleri görkezipdi.
