Bawariýanyň Trostberg şäheriniň 56 ýaşly ýaşaýjysy onlaýn platforma arkaly bary-ýogy 15 ýewro ulanylan seýf satyn aldy, ýöne onuň içinden bahasy, takmynan, 32 müň ýewro deň bolan altyn bölegi çykdy. Bu täsin tapyndy barada ýerli polisiýa maglumatlaryna salgylanyp, DPA agentligi habar berdi.
Alyjy harydy kabul edip alanda hiç hili şübheli zat duýmady, ýöne öýünde ony gurnap otyrka, seýfi tötänleýin gyşardyp, gizlin bölümi tapýar. Polisiýanyň düşündirmegine görä, bu gizlin bölüm öndüriji zawod tarapyndan däl-de, soň eýesi tarapyndan goşulypdyr, şonuň üçin hem onuň bardygyndan hiç kimiň habary bolmandyr. Ýaşuly tapylan gymmatlyk barada haýal etmän hukuk goraýjy edaralara habar berdi.
Barlag işleriniň dowamynda seýfi satan adamyň bu emlägi özüniň 90 ýaşly kakasynyň haýyşy boýunça satandygy anyklandy. Goja 250 gram agramyndaky altyn bölegini gizländigini ýadyndan çykarypdyr. Bu altynyň şertnamanyň bir bölegidigi ýa-da ýokdugy barada çylşyrymly raýat-hukuk dawasynyň döremek ähtimallygyna garamazdan, hiç hili kazyýet işine zerurlyk bolmady: seýfiň täze eýesi gymmat bahaly metaly öňki eýesine meýletin we höwes bilen gaýtaryp berdi.
