Kia we Genesis kompaniýalary ýangyç ulgamynda ýüze çykan kemçilik sebäpli 235 792 sany awtomobili yzyna çagyrmak barada karara geldiler. Bu kemçilik benziniň syzmagyna we netijede ulagyň ot almagyna sebäp bolup biler diýip, Carscoops neşiri ýazýar.
Bu tehniki hyzmat ediş sanawyna hem ulanylyp ýörlen, hem-de şu ýyl önümçilikden çykan täze awtomobiller düşýär. Esasy töwekgelçilik hereketlendiriji bölümindäki ýokary basyşly ýangyç geçirijisiniň germetikliginiň ýitirilmegi bilen baglanyşyklydyr.
Näsazlygyň sebäbi hökmünde ýangyç magistralyny berkidýän nurbatlaryň biriniň nädogry berkidilmegi görkezilýär. Wagtyň geçmegi bilen bu berkitme gowşap, ýangyjyň gyzan hereketlendiriji bölekleriniň üstüne dökülmegine eltip bilýär.
Öndürijilere benzin ysy we kapotyň astyndaky suwuklyk yzlary barada 400-e golaý şikaýat gelip gowşan hem bolsa, häzirki wagtda hakyky ýangyn hadysalary barada maglumat ýok. Hünärmenleriň çaklamasyna görä, aslynda bu kemçilik yzyna çagyrylýan ulaglaryň diňe 1 göteriminde bar.
Bu maksatnama 141 müň sany Kia Carnival miniweni (2022–2026-njy ýyllarda öndürilen) we «Genesis» markasynyň G80, G90, GV70 hem-de «GV80» modellerinden (2021–2025-nji ýyllarda öndürilen) jemi 95 müňe golaý awtomobili öz içine alar.
Mugt tehniki hyzmatyň çäginde hünärmenler birleşdiriji ýerleriň ygtybarlylygyny barlarlar, nurbatlary berkiderler, eger syzma anyklansa, ýangyç şlanglaryny doly çalşarlar.
