Netflix striming hyzmatynyň esaslandyryjysy Rid Hastings müdirler geňeşiniň başlygy wezipesiniň möhleti tamamlanandan soň, iýun aýynda kompaniýadan gider.
Paýdarlara ýollan hatynda ol bu çözgüdini haýyr-sahawat we beýleki taslamalara köp wagt sarp etmek islegi bilen düşündirdi.
«Netflix meniň durmuşymy köp babatda üýtgetdi, meniň iň gowy görýän ýatlamam bolsa 2016-njy ýylyň ýanwar aýy — şonda biz hyzmatymyzy bütin dünýä üçin elýeterli edipdik» – diýip, Hastings belledi. Şeýle hem ol ulanyjylaryň kanagatlanmasyna aýratyn üns berilmegini, korporatiw medeniýetiň döredilmegini we uzak wagtlap üstünlikli bolmagy başarýan kompaniýanyň ösdürilmegini özüniň goşan iň uly goşandy hökmünde görkezdi.
Hastings Netflix-i 1997-nji ýylda Mark Rendolf bilen bilelikde esaslandyrdy. Ilkibaşda hyzmat poçta arkaly DVD prokaty bilen meşgullanypdy, soňra bolsa film we seriallaryň önümçiligine üns berip başlady. Ol 25 ýyllap baş direktor wezipesini eýeledi.
2025-nji ýylyň dekabrynda kompaniýa Warner Bros. Discovery-ny satyn almak mümkinçiligini göz öňünde tutupdy, emma soň bu söwdadan ýüz öwürdi. 2026-njy ýylyň birinji çärýeginde Netflix ýazylyşyk bahalarynyň gymmatlamagynyň we mahabatdan gelýän girdejileriň artmagynyň hasabyna girdejisiniň 16% ýokarlanandygyny habar berdi, muňa garamazdan kompaniýanyň paýnamalary, takmynan, 8% aşak düşdi.
