Beýik Britaniýa Rolls-Royce kompaniýasy bilen ilkinji kiçi modully ýadro reaktorlaryny gurmak barada şertnama baglaşdy. Bu taslama arassa energiýany ösdürmek we ýurduň energetika howpsuzlygyny berkitmek maksady bilen durmuşa geçirilýär. Ylalaşyga döwlete degişli Great British Energy – Nuclear kompaniýasy bilen gol çekildi.
Meýilnama laýyklykda, umumy kuwwaty azyndan 1,4 gigawat bolan üç sany energetika bloguny gurmak göz öňünde tutulýar. Hasaplamalara görä, bu kuwwat 3 million töweregi öýi 60 ýyldan gowrak wagtyň dowamynda elektrik energiýasy bilen üpjün etmäge ýeterlikdir.
Taslamany maliýeleşdirmek meselesi eýýäm tassyklanyldy. 2025-nji ýylda hökümet bu iş üçin 2,6 milliard funt sterling möçberinde serişde goýberdi. Mundan başga-da, Milli baýlyk gaznasy taslamany işläp düzmek we ony işe girizmek üçin goşmaça 599 million funt sterling möçberinde pul serişdesini gönükdirer.
Reaktorlaryň energiýa ulgamyna 2030-njy ýyllarda birikdirilmegine garaşylýar. Belläp geçsek, «Rolls-Royce» kompaniýasy bu taslamanyň gurluşygy boýunça geçirilen tenderi öň ýeňip, gerekli hukuklary gazanypdy.
