Rolls-Royce kompaniýasy çäkli mukdarda çykaryljak Nightingale elektrik kabrioletini tanyşdyrdy. Bu model «Coachbuild» bölüminiň ilkinji resmi kolleksiýasy bolar we jemi 100 nusgada öndüriler. Täze model Spectre elektrik kupesiniň esasynda döredildi. Ol uzynlygy 5,76 metr bolan iki orunlyk kabrioletdir.
Awtomobiliň dizaýnyndaky uzyn kapot, äpet radiator gözenegi, inçejik swetodiod faralar we 24 dýuýmlyk tigirleri 1920-nji ýyllaryň «ar-deko» stilini ýatladýar. Maşynyň yzky bölegi bolsa ýumşak çyzyklar we bezeg yşyklandyryşy bilen tapawutlanýar.
Her bir awtomobil Gudwuddaky zawodda müşderiniň gatnaşmagynda aýratynlykda ýygnalar. Özi-de bu model diňe brendiň hemişelik alyjylaryna hödürlener.
Bahasy babatda açyk bir zat aýdýan ýok, ýöne onuň millionlarça dollara barabar boljakdygy güman edilýär. Salon iki ýolagçynyň rahatlygy üçin niýetlenendir. Mata üçek kaşemir we ýeňil materiallar ulanylan köp gatlakly ses izolýasiýasy bilen üpjün edilen. Tehniki häsiýetnamalary entek doly mälim edilmese-de, awtomobiliň doly elektrik energiýasy bilen işlejekdigi we ilkinji sargytlaryň 2028-nji ýylyň tomsundan soň gowşurylyp başlanjakdygy anyk.
