Rolls-Royce kompaniýasy 2030-njy ýyla çenli öz modeller hataryny doly elektrik hereketlendirijä geçirmek meýilnamasyndan dändi. Bu barada kompaniýanyň ýolbaşçysy Kris Braunrij habar berdi diýip, "Motor1" neşiri ýazýar.
Onuň aýtmagyna görä, bu karar alyjylaryň islegleri bilen baglanyşyklydyr. Kompaniýa premium segmentde elektrik ulaglara bolan gyzyklanmanyň pesligini belleýär. Elektromobilleri halaýan her bir müşderä derek, olar bilen gyzyklanmaýan başga bir müşderi tapylýar.
Rolls-Royce içinden otlanýan hereketlendirijili awtoulaglary öndürmegini dowam etdirmegi we özüniň meşhur V12 hereketlendirijisini kämilleşdirmegi maksat edinýär.
Şol bir wagtda, elektrik "Spectre" kupesiniň geljegi heniz anyk däl. Bu model ilkibaşda gowy garşylanan hem bolsa, soňra satuwlar peseldi we 2025-nji ýylda diňe müňden gowrak awtoulag satyldy. Muňa garamazdan, "Spectre" benzinde işleýän "Ghost" modelinden az-owlak gowy satylýar.
Mundan ozal BMW konserni hem V12 hereketlendirijisini täze ekologiýa talaplaryna uýgunlaşdyryp, saklap galmak niýetini mälim edipdi. Meňzeş çemeleşmeleri "Mercedes-Benz" hem göz öňünde tutýar, ol ýerde bu hereketlendiriji häzirki wagtda diňe S-klasynyň sowutly wersiýasynda ulanylýar.
