«Ýaş Şerlok» (Молодой Шерлок) serialy ikinji möwsüme uzaldyldy diýip, Deadline neşiri habar berýär. Taslamanyň birinji möwsüminiň premýerasy 4-nji martda Prime Video platformasynda bolupdy.
Režissýor Gaý Riçi serialyň dowamynyň ilkinji bölümine režissýorlyk eder we taslamanyň ýerine ýetiriji prodýuseri hökmünde çykyş eder.
Birinji möwsümiň sýužeti 1870-nji ýyllaryň Oksfordynda bolup geçýär. Baş gahryman özüniň ilkinji derňewine girişýän, häsiýeti çylşyrymly ýetginjek hökmünde görkezilýär. Ol bir adam ölüminiň üstüni açmak bilen, özüniň geljekki ykbalyna täsir etjek halkara dildüwşügiň üstünden barýar.
Baş keşbi Hiro Faýns-Tiffin ýerine ýetirdi. Şeýle hem taslamada Donal Finn, Sen Szine, Jozef Faýns, Nataşa MakElhon, Maks Aýrons we Kolin Fert ýaly aktýorlar çykyş etdi.
Serial Endrýu Leýniň ýaş detektiw baradaky kitaplar toplumyna esaslanýar. Soňky roman 2015-nji ýylda neşir edilipdi.
Bu Gaý Riçiniň Artur Konan Doýluň eserleri bilen bagly ilkinji taslamasy däldir. Ol mundan ozal Şerlok Holmsyň rolunda Robert Dauni-kiçiniň we doktor Watsonyň rolunda Jud Louwyň oýnamagynda «Şerlok Holms» (2009) we «Şerlok Holms: Kölegeler oýny» (2011) filmlerini surata düşüripdi.
