Hindistanyň Infosys IT-kompaniýasy dünýäniň ikinji raketkasy, ispan tennisçisi Karlos Alkaras bilen köpýyllyk hyzmatdaşlygy yglan etdi. Ylalaşygyň şertlerine görä, 22 ýaşly türgen brendiň global ilçisi bolar.
Kompaniýa tennisçi we onuň topary üçin emeli aňa esaslanan çözgütleri hödürlär. Infosys Topaz platformasy oýunlary seljermek we oýunçynyň sport ukybyny bahalandyrmaga kömek etjek şahsy goşundyny döretmek üçin ulanylar. Bu gural oňa garşydaşlaryna garşy has gowy taýýarlanmaga we oýun wagtynda dogry çözgütler kabul etmäge ýardam berer.
Hyzmatdaşlyk durmuşy taslamalary hem öz içine alar. Infosys kompaniýasy Carlos Alcaraz Foundation gaznasy bilen bilim we haýyr-sahawat ulgamynda bilelikdäki başlangyçlary amala aşyrmagy meýilleşdirýär.
Alkaras şeýle tehnologiýalaryň öz oýnuny has çuňňur seljermäge kömek etjekdigini belledi. Onuň aýtmagyna görä, ýokary derejeli sportda köp zady ownuk detallar çözýär we maglumatlardan peýdalanmak goşmaça artykmaçlyk berip biler.
Infosys tennis pudagynda 10 ýyldan gowrak wagt bäri işleýär. Kompaniýa oýunçylar we ýaryşlar üçin sanly hyzmatlary ösdürýär. 2023-nji ýylda kompaniýa Rafael Nadal we Iga Şwýontek bilen şertnama baglaşdy, şeýle hem ATP, Australian Open we Rollan Garros ýaryşlary bilen hyzmatdaşlyk edýär.
