Beýik Britaniýada «Titanik» gämisiniň ýolagçysy Laura Meýbl Frankatelliniň halas ediş gursakçasy 475 müň dollar baha bilen auksiona çykaryldy. Söwdany «Henry Aldridge & Son» auksion öýi alyp barýar.
Birinji klasda syýahat eden Frankatelli 1912-nji ýylda gämi heläkçilige uçran wagty halas ediş gämisine münmezinden ozal bu gursakçany geýipdir. Onuň ýatlamagyna görä, nätanyş bir erkek adam munuň ätiýaçlyk çäresidigini aýdyp, oňa gursakçany geýmäge kömek edipdir.
Ilki bilen ol we ýanyndaky ýoldaşlary birnäçe halas ediş gämisine münmäge synanyşypdyr, emma başa barmandyr. Netijede olara 40 adama niýetlenen, ýöne bary-ýogy 12 adam bilen suwa goýberilen 1-nji belgili halas ediş gämisinden ýer tapmak başardýar. Soňra olary «Karpatiýa» gämisi halas edýär.
«Titanikden» halas bolan ýolagçylar «Karpatiýa» halas ediş gämisiniň bortunda. Bu suratda Laura Meýbl Frankatelli (ýokarky hatarda, sagdan üçünji) öz iş berijileri — jenap Kosmo Daff-Gordon we onuň aýaly Lýusi (hanym Daff-Gordon) bilen bile dur. Olar soňlugy bilen «pul gämisi» diýlip atlandyrylan 1-nji belgili halas ediş gämisinde halas bolan az sanly birinji klas ýolagçylarynyň biridir.
Auksion öýüniň wekili Endrýu Oldrijiň aýtmagyna görä, «heläkçilikden aman galanlaryň geýen halas ediş gursakçalaryndan diňe birnäçesi saklanyp galypdyr. Galanlaryň ählisi muzeýlerde bolup, olar hiç wagt satylmaz».
«Titanik» gämisi 1912-nji ýylyň 10-njy aprelinde syýahata ugraýar we 15-nji aprele geçilýän gije aýsberg bilen çaknyşyp, suwa gidýär. Heläkçiligiň netijesinde 1,5 müňe golaý adam heläk bolýar, 712 adama bolsa halas bolmak başardýar.
