Ýagşygeldi Kakaýew adyndaky Halkara nebit we gaz uniwersitetinde «Lu Ban ussahanasy» açyldy. Dabara Hytaýyň Döwlet Geňeşiniň Premýeriniň birinji orunbasary Din Sýuesýanyň ýolbaşçylygyndaky wekiliýet gatnaşdy.
Bu taslama ylym we bilim ulgamyny döwrebaplaşdyrmak ugrunyň çäklerinde durmuşa geçirilýär. Hünärmenleri taýýarlamak we täze tehnologiýalary ornaşdyrmak ýurduň ykdysady ösüşiniň binýady hasaplanýar. Bu ugurda tehnologiýa we bilim tejribesini alyşmaga gönükdirilen Hytaý bilen hyzmatdaşlyk möhüm orun tutýar.
«Lu Ban ussahanasy» nebit-gaz ulgamy üçin hünärmenleri taýýarlamaga niýetlenen döwrebap enjamlar bilen üpjün edildi. Talyplar we mugallymlar geologiýa, buraw işleri hem-de maglumat ulgamlary bilen işlemek usullaryny öwrenip biler.
«Lu Ban ussahanasynyň» özara tejribe alyşmak üçin möhüm meýdança öwrülmegine, bilim ulgamyna döwrebap tehnologiýalary ornaşdyrmaga ýardam etmegine we Türkmenistan bilen Hytaýyň arasyndaky hyzmatdaşlygyň ösmegine goşant goşmagyna garaşylýar.
