Paramount kinokompaniýasy meşhur «Call of Duty» wideooýunlar seriýasynyň esasynda düşüriljek çeper filmiň çykjak senesini resmi taýdan mälim etdi. Filmi 2028-nji ýylyň 30-njy iýunynda çykarmak meýilleşdirilýär. Onuň önümçiligi Paramount we Activision studiýasynyň arasynda baglaşylan ylalaşykdan soňra başlandy.
Häzirki wagtda filmiň sýužeti we aktýorlar düzümi baradaky maglumatlar gizlin saklanýar. Emma režissýorlyk kürsüsinde «Watançylaryň güni» (“День патриота”) filmi bilen tanalýan Piter Bergiň oturjakdygy eýýäm mälimdir. Berg ssenariniň üstünde meşhur «Ýellowstoun» (Йеллоустоун) serialynyň awtory Teýlor Şeridan bilen bilelikde işleýär.
Bellemeli zat, Berg bilen Şeridanyň şowly hyzmatdaşlyk tejribesi bar. Olar 2016-nji ýylda tankytçylaryň ýokary bahasyna mynasyp bolan we «Oskar» baýragynyň dört nominasiýasyna hödürlenen «Her edip, hesip edip» (Любой ценой) filmini bilelikde taýýarlapdylar.
