Trump Mobile kompaniýasy özüniň resmi saýtyny täzeledi we T1 Phone smartfonynyň täzeden işlenilen wersiýasyny hödürledi.
Täze modelde dizaýn üýtgedilip, ekran ulaldyldy we tehniki görkezijiler döwrebaplaşdyryldy. Enjamyň 2025-nji ýylyň tomsunda yglan edilen nusgasyny kämilleşdirmek işleri häzirki wagtda hem dowam edýär.
T1 Phone-yň häzirki dizaýny kompaniýanyň ýolbaşçylarynyň fewral aýynda görkezen şekillerine doly gabat gelýär. Smartfon özüniň altyn öwüşginli korpusyny, ABŞ-nyň stile laýyk edilen baýdagyny we yzky panelindäki brendiň logosyny saklap galdy, emma "T1" diýen uly ýazgy aýryldy.
The Verge neşiriniň bellemegine görä, enjam daşyndan HTC U24 Pro modeline meňzeýär, bu bolsa olaryň umumy ODM-hyzmatdaşyny ulanýan bolmagyndan habar berýär.
Tehniki aýratynlyklarda düýpli üýtgeşmeler ýüze çykdy. Ozalky kiçi ekranyň ýerine indi 120 Gs täzelenme ýygylygy bolan 6,78 dýuýmlyk AMOLED-displeý ulanylar. Enjam Android 15 operasion ulgamynda işläp, onuň esasy goşundysy Snapdragon 7-nji seriýaly prosessor (takyk modeli aýdylmaýar) bolar.
Akkumulýatoryň sygymy 5000 mAs bolup, ol 30 watlyk zarýad beriş ulgamyny goldaýar. Kameralar ulgamy 50 Mp esasy datçikden, 8 Mp ultra giň burçly moduldan we tele-obýektiwden ybaratdyr. Mundan başga-da, modelde seýrek duş gelýän 3,5 mm-lik gulaklyk deşiginiň saklanyp galmagy ünsüňi çekýär.
Meseleleriň maliýe tarapy bolsa entek doly aýdyň däl. Saýtdan enjamyň 499 dollar töweregi boljakdygy baradaky maglumat aýryldy, ýöne 100 dollar möçberinde depozit goýmak bilen deslapky sargyt etmek mümkinçiligi saklanyp galdy. Smartfonyň gutarnykly bahasynyň 1000 dollardan geçmezligine garaşylýar.
Şeýle-de, smartfonyň resmi taýdan satuwa çykaryljak wagty nämälimligine galýar, sebäbi "şu ýylyň ahyrynda" diýen ýazgy hem kompaniýanyň web-sahypasyndan öçürildi.
