Günorta Kaliforniýa uniwersitetiniň inženerleri 700 dereje gyzgynlyga çenli bökdençsiz işlemäge ukyply elektron enjamyny işläp düzdüler. Bu täsin açyş baradaky makala Science žurnalynda çap edildi.
Adaty elektronika ulgamlary 200°C töweregi gyzgynlykda hatardan çykyp başlaýar. Bu çäklendirme uzak wagtlap ekstremal şertlerde işleýän tehnika üçin iň uly bökdençlikleriň biri bolup galýardy.
Täze oýlap tapylan memristor atly ykjam enjam bolsa, maglumatlary saklamak we hasaplamalary ýerine ýetirmek bilen birlikde, ýokarda agzalan kynçylykdan hem halas etjege meňzeýär.
Enjam elektrodlardan we olaryň arasyndaky keramiki gatlakdan ybaratdyr. Ony döretmek üçin ýokary gyzgynlyga durnukly bolan wolfram, gafniý oksidi we grafen ýaly materiallar ulanyldy.
Bu taslamada grafen esasy orny tutýar. Ol gyzgynlyk wagtynda enjamyň içindäki metal atomlarynyň hereketlenmeginiň öňüni alýar. Adatça, şol atomlaryň hereketi gyzgynlykda gysga utgaşma sebäp bolýardy. Emma synag wagtynda enjam 700°C gyzgynlykda hem hiç hili näsazlyk görkezmedi. Bellemeli zat, bu gyzgynlyk derejesi diňe çipiň däl-de, eýsem, barlaghanadaky synag enjamynyň hem iň ýokary mümkinçiligi boldy.
Bu tehnologiýa geljekde älem syýahatlarynda, meselem, Wenera planetasyna iberiljek desgalarda, şeýle-de geotermal energetika we ýadro desgalary ýaly aşa gyzgyn şertli pudaklarda giňden ulanylar.
