Warner Bros. kompaniýasy «Gollumyň awynda» (Охота за Голлумом) atly filmiň 2027-nji ýylyň 17-nji dekabrynda ekranlara çykjakdygyny habar berdi. Şeýle hem aktýorlar düzümini mälim etdi.
Aragornyň keşbini Jeými Dornan ýerine ýetirer. Keýt Winslet bolsa Merigoldy oýnar. Şol bir wagtda eýýäm tanyş bolan rollara Endi Serkis (Gollum), Ien Makkellen (Gendalf), Li Peýs (Tranduil) we Elaýja Wud (Frodo) dolanyp geler.
Filmiň sýužeti «Hobbit» we «Ýüzük doganlygy» bölümleriniň arasyndaky wakalary öz içine alýar. Wakanyň özeni Gollumy tapmak ugrundaky gözleglere gönükdirilendir: Gollum Ýüzügiň nirededigini Saurona aýtmaka, Aragorn ony tapmak üçin howply syýahata ugraýar.
Bellesek, Piter Jeksonyň filmlerinde Aragornyň keşbini Wiggo Mortensen ýerine ýetiripdi.
Täze taslamanyň režissýory Endi Serkis boldy. Ssenarini bolsa Filippa Boýens, Fren Uolş, Fibi Gittins we Arti Papageorgiu ýazdy.
«Bu hakykatdan-da "tanapyň üstünde ýöremek" ýaly örän takyklygy talap edýän iş. Ilki bilen, "Ýüzükleriň hökümdarynyň" asyl nusgalarynyň üstünde işlän ähli topar ýene-de bir ýere jemlendi. Şonuň üçin film Piter Jeksonyň trilogiýasynyň — "Ýüzükleriň hökümdarynyň" we "Hobbitiň" dünýäsine we garaýyşlaryna berk esaslanýar. Hiç hili şübhesiz, bu Ortaýer baradaky hakyky hekaýat ýaly kabul ediler. Emma şol bir wagtda, bu Tolkiniň iň çylşyrymly gahrymanlarynyň biri bolan Gollumyň has çuňňur psihologik seljermesi bolar. Netijede örän gyzykly utgaşyk emele gelýär» – diýip, Serkis belledi.
