OpenAI kompaniýasy kiberhowpsuzlyk pudagynda ulanmak üçin niýetlenen täze emeli aň modelini — «GPT-5.4-Cyber-y» hödürledi. Bu model ýakyn aýlarda çykaryljak has güýçli çözgütlere taýýarlyk görmäge we kiberhowplar bilen işleşmäge ýöriteleşdirilendir.
Täze modeliň esasy aýratynlygy — onuň hemmeler üçin elýeterli däldigidir. «GPT-5.4-Cyber» ulgamyna diňe kiberhowpsuzlyk ugrundan ýokary hünär derejesini tassyklap bilen ulanyjylar girip bilerler. Kompaniýanyň bellemegine görä, bu model adaty nusgalardan has giň mümkinçiliklere we az çäklendirmelere eýe bolup, örän çylşyrymly gorag wezipelerini ýerine ýetirmäge ukyplydyr.
Artykmaç taraplary hökmünde ulgamyň programmalaryň başlangyç koduna zerurlyk duýmazdan, eýýäm taýýar programmalary seljerip bilýändigini, zyýanly programmalary tapmakda, ulgamlaryň gowşak nokatlaryny anyklamakda we olaryň durnuklylygyna baha bermekde uly ýardam berýändigini bellemek bolar.
Bu modeli ulanmak hukugy, ilki bilen, diňe ýörite barlagdan geçen guramalara we barlagçylara berler.
GPT — bu tekstler, programmalaşdyryş kodlary we maglumatlar bilen işlemegi başarýan neýroulgamlar maşgalasydyr. Ol meşhur «ChatGPT» ýaly çat-botlaryň esasy binýady bolup hyzmat edýär. Täze kiber-modeliň döredilmegi bolsa, emeli aňyň diňe bir kömekçi däl, eýsem, güýçli gorag guralyna öwrülýändigini subut edýär.
