15-nji aprelde Türkmenistanyň Bilim ministrliginde ministr Jumamyrat Gurbangeldiýew bilen Russiýa Federasiýasynyň Tatarystan Respublikasynyň premýer-ministriniň orunbasary Wasil Şaýhraziýewiň arasynda duşuşyk geçirildi. Gepleşikleriň dowamynda bilim ulgamyndaky hyzmatdaşlygy giňeltmegiň geljegi maslahatlaşyldy diýip, ministrligiň metbugat gullugy habar berýär.
Taraplar ikitaraplaýyn gatnaşyklaryň häzirki ýagdaýyna we ony mundan beýläk-de ösdürmegiň ýollaryna garady. Bilim ulgamyndaky hyzmatdaşlygyň hereket edýän ylalaşyklara esaslanýandygy we eýýäm amaly netijeleri berýändigi bellenildi. Ýokary okuw mekdepleriniň arasyndaky gatnaşyklara aýratyn üns berildi.
Hünärmenleri taýýarlamak meseleleri maslahatlaşyldy. Tatarystanyň ýokary okuw mekdeplerinde okaýan türkmen talyplarynyň sanynyň ýokarydygy we olaryň daşary ýurtly talyplaryň arasynda öňdebaryjy orunlary eýeleýändigi bellenildi.
Şeýle hem taraplar sanly bilim, döwrebap tehnologiýalary ornaşdyrmak we okuw mekdeplerini sanlylaşdyrmak ulgamynda tejribe alyşmagyň ähmiýetini nygtady. Türkmenistanyň halkara çärelerine, şol sanda Kazan Digital Week forumyna gatnaşmagy hem-de Tatarystanyň bu ugurdaky tejribesine bolan gyzyklanmasy bellenilip geçildi.
Mugallymlaryň hünärini ýokarlandyrmak boýunça alnyp barylýan işler aýratyn bellenildi. Mysal hökmünde 2023–2025-nji ýyllarda Naberežnyýe Çelny döwlet mugallymçylyk uniwersitetiniň mugallymlary tarapyndan Türkmenistanda geçirilen okuw maslahatlary görkezildi.
Duşuşykda ýaşlar syýasaty we medeni-ynsanperwer hyzmatdaşlyk meselelerine hem deglip geçildi. Türkmen mekdep okuwçylarynyň we talyplarynyň Tatarystandaky halkara olimpiadalaryna işjeň gatnaşýandygy bellenildi. Şeýle hyzmatdaşlygyň ýene-de bir mysaly hökmünde 2024-nji ýylda Türkmenistanda geçirilen Halkara matematika olimpiadasynda üstünlikli çykyş eden tatarystanly okuwçylaryň «Awazada» dynç alandyklary agzaldy.
Duşuşygyň netijeleri boýunça taraplar hyzmatdaşlygy mundan beýläk-de ösdürmäge taýýardyklaryny tassyklady.
