Iconic Auctioneers auksion öýi 1956-njy ýylda aktrisa Merilin Monronyň süren, 1950-nji ýylda öndürilen üýtgeşik Mercedes-Benz 170 S (W136) awtoulagyny auksionda satar.
Kämil görnüşde dikeldilen awtoulagyň bahasy 120 000 – 160 000 funt sterling aralygynda (162 000 – 216 000 dollar aralygynda).
Ulagyň kino ýyldyzy bilen baglanyşygy "MM" monogrammaly çemedanlar toplumy we 1956-njy ýylyň fewral aýynda gol çekilip, aktrisanyň adyna resmileşdirilen ätiýaçlandyryş şahadatnamasy arkaly häzirki eýesi tarapyndan anyklandy.
Resminama Monronyň bu awtoulagy Ýewropa syýahatlary mahalynda ulanandygyny tassyklaýar. Şeýle monogramma awtoulagyň alynky panelini hem bezeýär.
Bu del awtoulag Beýik Britaniýada zindelfingenli inženerleriň kömegi bilen doly abatlanyp dikeldildi. Awtoulag, esasan, asyl şaýlar we hakyky çyzgylar ulanylyp, başdanaýak täzeden ýygnaldy.
Mercedes-Benz 170 S-iň kapotynyň aşagynda 52 at güýjüne eýe bolan 1,7 litrlik dört silindrli hereketlendiriji ýerleşýär we awtoulagyň geçen aralygy 70 müň kilometrden sähel gowrak.
