Boulderdäki Kolorado uniwersitetiniň alymlary osteoartrozdaky bogunlaryň dargama prosesini yzyna öwürmäge ukyply dermanlary ýetirmegiň täzeçil ulgamyny döretdiler. Haýwanlar arkaly geçirilen tejribeler dermanyň haýal bölünip çykýan görnüşiniň ýekeje sanjymynyň bary-ýogy birnäçe hepdede kekirdewük we süňk dokumalarynyň dikeliş prosesini başladýandygyny tassyklady.
Häzirki wagtda osteoartroz bejerip bolmaýan kesel hasaplanýar, şeýle näsaglar ömürboýy agyry kesiji dermanlary kabul etmäge ýa-da bogunlaryny çalşyrmak üçin operasiýa geçirmäge mejbur bolýarlar. Täze tapylan tehnologiýa bolsa, keseliň diňe alamatlaryny aýyrmaga däl-de, eýsem, şikeslenen gurluşlary hem düýpli dikeltmäge gönükdirilendir.
Stefani Braýantyň ýolbaşçylygyndaky topar kekirdewükdäki kemçilikleri doldurýan we organizmiň öz öýjüklerini şol ýere çekýän ýörite «implantlary» döretmegiň üstünde hem işleýär.
Barlagçylar keseliň ähli dört basgançagy üçin hem bejergi çözgütlerini hödürlemegi meýilleşdirýärler. Şunuň bilen birlikde, kekirdewügiň saglygyny saklamak üçin semaglutidiň mümkinçilikleri hem öwrenilýär.
Häzirki wagtda topar enjamyň howpsuzlyk we toksikologiýa görkezijilerini öwrenýär. Eger haýwanlarda edilýän synaglaryň häzirki tapgyry üstünlikli tamamlansa, 18 aýyň dowamynda adamlar bilen geçiriljek kliniki synaglara hem başlanar.
