Çempionlar ligasynyň çärýek finalynyň jogap duşuşyklarynyň netijeleri boýunça ýarym finalyň ilkinji gatnaşyjylary mälim boldy: PSŽ myhmançylykda «Liwerpuldan» üstün çykdy, Madridiň «Atletikosy» bolsa öz meýdançasynda «Barselonadan» utuldy, emma iki oýnuň jemi boýunça indiki tapgyra geçdi.
«Liwerpul» —«Pari Sen-Žermen»
Liwerpuldaky oýun PSŽ-nyň peýdasyna 0:2 hasabynda tamamlandy. Iki gol urmagy başaran Usman Dembele duşuşygyň esasy gahrymany boldy.
Parižde geçirilen birinji oýunda-da PSŽ hut şu hasap bilen ýeňipdi. Şeýlelikde, fransuz kluby mersisaýdlylary umumy 4:0 hasaby bilen utdular.
Ýatlap geçsek, ýaryşyň geçen möwsüminde-de, ýöne 1/8 final tapgyrynda «Liwerpuly» hut parižli futbolçylar «ynjydypdy».
Indi Luis Enrikiniň şägirtleri ýarym finalda «Real Madrid» — «Bawariýa» jübütiniň ýeňijisi bilen duşuşar. Bu iki toparyň jogap oýny şu gije 12:00-da başlanar. Geçen hepde «Santýago Bernabeu» stadionynda geçen duşuşykda mýunhenli klub 2:1 ýeňipdi.
«Atletiko» — «Barselona»
Madridde «Atletiko» birinji oýundaky ýeňşinden (2:0) soň «Barselonany» kabul etdi.
Katalon toparyň futbolçylary ot ýaly bolup, oýnuň başynda alyp-ýoluo barýardylar we eýýäm 4-nji minutda, soňam 24-nji minutda gol salyp, umumy hasaby deňlediler, tapawutlananlar – Lamin Ýamal bilen Ferran Torres. Olar şonuň göni yzýany hatda üçünji gola-da juda ýakynladylar, emma derwezebanyň öňünde ýeke galan Fermin Lopesiň kelle bilen uran topuny Musso gaýtarmagy başardy. Şol pursatda derwezeban butsynyň aşagyndaky tikenleri bilen Lopesiň ýüzüni sypjyrdyp, ony erbet ýaralady.
Fermine lukmançylyk kömegi berilýänçä ara giren böwşeňlik Diego Simeoneniň şägirtlerine demini dürsemäge hem aýňalmaga maý berdi. 30-njy minutda oýun başlanan badyna olar garaşylmadyk ýagdaýda garşylykly hüjüme gitdiler, ol hem Ademola Lukmanyň goly bilen tamamlandy.
Ikinji ýarymda madridliler esasan goraga üns berdiler. «Barselonanyň» ýagdaýy halas etmek üçin eden synanyşyklary netije bermedi. Ferranyň uran ýene bir goly ofsaýd sebäpli hasaba alynmady. Oýnuň ahyrynda Erik Garsianyň iň soňky umyt foly üçin göni gyzyl kart bilen meýdandan kowulmagy katalonlaryň ýagdaýyny has-da kynlaşdyrdy.
Şeýlelikde, duşuşyk 1:2 hasaby bilen tamamlandy. «Atletiko» iki oýnuň netijesi boýunça (3:2) ýarym finala çykdy.
Simeoneniň topary soňky dokuz ýylda ilkinji gezek ýarym finala ýetdi. Indiki tapgyrda madridliler «Arsenal» — «Sporting» duşuşygynyň ýeňijisi bilen ýüzleşer. Bu garşydaşlygyň birinji oýny Lissabonda iňlis klubunyň peýdasyna 1:0 hasaby bilen tamamlanypdy. Jogap oýny şu gije Londonda sagat gije 12:00-da başlanar.
