Pekinde adampisint (gumanoid) robotlar üçin Hytaýyň taryhynda ikinji gezek geçiriljek ýarym marafona taýýarlyk synaglary başlandy. Oňa ýüzden gowrak robot gatnaşar.
21 kilometr aralyga resmi ylgaw 19-njy aprelde E-Town ösüş zolagynda meýilleşdirilýär. Onuň maksady robotlary hakyky ulanyş şertlerinde barlamakdan ybaratdyr. Gijeki synag ylgawynyň çäginde 70-den gowrak topar çelgi alyş derejesini, enjamlaryň sazlaşygyny we robotlaryň adatdan daşary ýagdaýlara täsirlenişini barladylar. Hytaýyň Elektronika institutynyň wekili Lýan Lýanyň sözlerine görä, bu ýyl wezipe ep-esli kynlaşdy. Ýagny toparlaryň takmynan 40%-iniň indi doly awtonom nawigasiýany ulanýandyklary bilen baglylykda, täze nominasiýalar, şol sanda durnuklylyk we pellehana ýetmegi başarmak ukyby üçin baýraklar girizildi.
Köp işläp taýýarlaýjylar üçin bu aralyk uly kynçylyk bolup galýar. Geçen ýylky ýaryşda 21 robotdan diňe altysy pellehana ýetmegi başarypdy. Gatnaşyjylar bogunlaryň we hereketlendirijileriň gyzmagy, şeýle hem batareýalaryň tiz çökmegi ýaly birnäçe tehniki bökdençlikleri belleýärler. Meselem, Hytaýyň Oba hojalyk uniwersitetiniň wekilleri robotyň şaýlaryny gönümel akkumulýatorlaryň çalşylýan wagtynda sowatmaly boldular.
Şeýle-de bolsa, tehniki kynçylyklara garamazdan, ýaryşa bolan gyzyklanma ep-esli artdy. Gatnaşýan toparlaryň sany ilkinji ylgaw bilen deňeşdirilende bäş esse diýen ýaly köpeldi. Inženerler robotlaryň dolandyryş algoritmlerini we gurluşyny kämilleşdirmegiň hasabyna netijeleri gowulandyrmaga umyt edýärler.
