Ylmy-barlag pagtaçylyk institutynyň Daşoguz şahamçasynyň alymlary sebitiň şertlerine uýgunlaşdyrylan gowaçanyň täze görnüşlerini döretmegiň üstünde işleýär. Şu ýyl synag üçin «Daşoguz-11» we «Daşoguz-12» görnüşleri tabşyryldy diýip, «Altyn asyr» elektron neşiri habar berýär.
Daşoguz welaýat bölüminiň müdiri Ç.Seýitmyradowyň habar bermegine görä, täze işlenip taýýarlanan bu görnüşler orta süýümli gowaçalaryň hataryny dowam etdirýär.
«Biz sebitde ösdürilip ýetişdirilýän pagtanyň hil görkezijilerini gowulandyrmaga hem-de ýerli topraga we howa şertlerine has oňat uýgunlaşan ýokary hasylly görnüşleri döretmäge çalyşýarys. Täze görnüşler hasyllylygy, süýümiň çykyşy we onuň hili boýunça has ýokary görkezijiler bilen tapawutlanar» – diýip, ol belledi.
Pagtaçylyk sebitiň möhüm pudagy bolmagynda galýar. Welaýatda seleksiýadan başlap, çig maly gaýtadan işlemäge çenli doly önümçilik ulgamy hereket edýär. Pagta arassalaýjy zawodlar, şol sanda Köneürgenç etrabynda ýyllyk kuwwaty 40 müň tonna bolan kärhana işleýär. Şeýle hem üç sany pagta egriji fabrik, tikinçilik kärhanasy we pagta çig malyny ulanýan önümçilik desgalary bar.
Önümler hem içki bazara, hem eksporta ugradylýar.
