Amyderýa döwlet tebigy goraghanasynda işjeň ýaşlar üçin iki günlük eko-syýahat guraldy. Çäre ekologik sowatlylygy ýokarlandyrmaga we tebigata aýawly çemeleşmek ukyplaryny kemala getirmäge gönükdirildi diýip, «Ýaş tebigatçy» jemgyýetçilik guramasynyň saýty habar berýär.
Bu başlangyç «Ýaş tebigatçy» guramasy tarapyndan BMG-niň Ösüş Maksatnamasynyň (BMGÖM) hem-de Global ekologiýa gaznasynyň «Köp sanly bähbitleriň alynmagy üçin Aral deňziniň giňişliginde ýer serişdelerini we ýokary tebigy gymmatlygy bolan ekoulgamlary gorap saklamak we durnukly dolandyrmak» taslamasynyň çäklerinde amala aşyryldy.
Ýaş tebigatçylar hünärmenleriň ýolbaşçylygynda goraghananyň kenarýaka ekoulgamlary bolan tokaýlyklaryň ýagdaýyny öwrendi, Gyzyl kitaba girizilen seýrek duş gelýän haýwanlaryň we guşlaryň ýaşaýan ýerleri bilen tanyşdy. Şeýle hem olar daşky gurşawa aýawly çemeleşmegiň amaly endiklerini öwrendi.
Eko-syýahatyň amaly bölegi goralýan ýerlerde özüňi alyp barmagyň kadalaryny öwretmegi, tebigaty arassa saklamagyň meselelerini ara alyp maslahatlaşmagy hem-de ekologiýa taýdan dogry iýmitlenmegiň ýörelgeleri bilen tanyşmagy öz içine aldy.
«Bu eko-syýahat tebigat bilen içgin tanyşmaga we onuň ekoulgamyny gorap saklamagyň ähmiýetine göz ýetirmäge mümkinçilik berdi. Biz goraghananyň täsin dünýäsini öwrenmek bilen, tebigaty goramagyň her birimiziň mukaddes borjumyzdygyna ýene bir ýola göz ýetirdik» – diýip, «Ýaş tebigatçy» guramasynyň meýletinçisi Bahargül Kulyýewa öz täsirleri bilen paýlaşdy.
Çäräniň ahyrynda işjeň gatnaşanlara Hormat hatlary gowşuryldy.
