Wengriýanyň Etwoş Lorand uniwersitetiniň barlagçylary pişiklerin itlerden we kiçijek çagalardan tapawutlylykda, hiç wagt «kireýsiz kilim kakmaýandyklaryny» ylmy taýdan subut etdiler.
Animal Behaviour žurnalynda çap edilen maglumatlara görä, synag wagtynda adamlar ber-başagaý bolup, özlerine degişli haýsydyr bir zady gözlediler. Olara şol wagt töweregindäki pişikler asla pitiwa-da etmediler. Ýöne haçan-da, adamlar pişikleriň gowy görýän iýmitlerini ýa-da oýunjaklaryny gözlänlerinde welin, olar işeňňirlik bilen gözlege gatnaşdylar.
Edil şolar ýaly synagda itleriň we çagalaryň 75%-den gowragy zadyny gözleýän adama kömek etmäge çalyşdy. Pişikleriň bolsa 60%-i, gözleşenleri üçin hezzet görmejekdiklerini aňyp, haýyşa diýýämiňem diýmedi.
Alymlar munuň sebäbini ewolýusiýa (ösüş taryhy) bilen düşündirýärler. Itler, belli bolşy ýaly, arkama-arka aw awlamak we mal bakmak üçin adam bilen aragatnaşykda bolup geldiler. Pişikler bolsa, özlerini özleri eldekileşdirdiler we hiç wagt hem adama peýda getirmek şerti bilen ösdürilip ýetişdirilmedi.
Barlagçylar synagdaky emele gelen ýagdaýyň pişikleriň erbetdiklerini aňlatmaýandygyny tekrarlap, muny olaryň örän özbaşdakdygy bilen delillendirýärler.
Şeýle-de gözlegler pişikleriň erkek adamlara has köp üns berýändiklerini-de ýüze çykardy. Alymlar bu aýratynlygy erkekleriň pişikler bilen adatça az wagt geçirýändigi we haýwanlaryň şol boşlugy doldurmaga çalyşýandygy bilen düşündirýärler.
