Özbegistanyň Merkezi banky beýik serkerde Emir Teýmiriň doglan gününiň 690 ýyllygy mynasybetli ýadygärlik teňňelerini we sowgatlyk toplumlaryny dolanşyga goýberdi.
Agramy 31,1 gram (1 troýa unsiýasy) bolan teňňeleriň ählisi iň ýokary – 999,9 probaly altyndan we kümüşden taýýarlandy.
Teňňeleriň ýüzünde Emir Teýmiriň (Teýmirleňiň) şekili ýerleşdirilen. Şeýle hem üç teňňeden ybarat bolan ýörite toplumlary-da satyn alyp bolýar.
Ýadygärlik altyn şaýlaryň bahasy 61,4 mln sum (takmynan $6 140), bankyň yzyna satyn alyş bahasy 57,3 mln sum ($5 730), kümüş teňňeleriňki 1,9 mln sum (takmynan $190), yzyna satyn alyş bahasy bolsa 0,9 mln sum ($90) diýlip kesgitlenildi.
Merkezi bankyň bellemegine görä, bu teňňeler diňe bir gymmat bahaly metal bolman, eýsem ýokary çeperçilik we kolleksiýa ähmiýetine hem eýedir.
