Instagram ulanyjylary öz teswirlerini ýazandan soň, olara düzediş girizmek mümkinçiligine eýe boldy. Täze funksiýa teksti doly öçürmezden we täzeden ýerleşdirmezden, ýalňyşlary düzetmäge mümkinçilik berýär.
Kompaniýanyň habar bermegine görä, teswiri ýerleşdirilenden soň 15 minutyň dowamynda üýtgedip bolýar. Bu wagtyň içinde ulanyjy hem harp ýalňyşlaryny düzedip, hem-de ýazgynyň üstüni ýetirip ýa-da ony gysgaldyp biler. Şol aralykda girizilýän düzedişleriň sanyna hiç hili çäklendirme ýok.
Bu funksiýadan peýdalanmak üçin ýerleşdirilen teswiriň ýanyndaky «Redaktirlemek» düwmesine basmaly. Üýtgetmeler girizileninden soň, ýazgynyň aşagynda onuň redaktirlenendigi barada bellik peýda bolar.
Ozal ýalňyşlary düzetmek üçin ulanyjylar teswiri öçürmeli we täzeden ýazmaly bolýardy.
Kompaniýanyň maglumatlaryna görä, geçen ýyl platformanyň her aýdaky işjeň ulanyjylarynyň sany 3 milliard adamdan geçdi. Redaktirlemek funksiýasynyň girizilmegi ýalňyşly teswirleriň sanyny azaltmaga ýardam edip biler.
