Sarp edijileriň hukuklaryny goramak we jemgyýetiň bähbitlerini öňe sürmek bilen meşgullanýan amerikan täjirçilik däl guramalarynyň federasiýasy U.S. PIRG bejerilmesi kyn smartfonlar baradaky «Failing the Fix» ýyllyk hasabatyny hödürledi. Bu sanawyň iň ýokarsynda iPhone ýerleşdi.
Şu ýyl baha bermek işleri Ýewropanyň täze EPREL ulgamy boýunça amala aşyryldy. Ol enjamlary sökmegiň kynlygyny, ätiýaçlyk şaýlarynyň elýeterliligini, zerur gurallary we tehniki resminamalaryň bar bolmagyny göz öňünde tutýar.
Barlaglaryň netijesine görä, Apple kompaniýasy «D-», Samsung bolsa «D» bahasyny aldy. Iki kompaniýa hem sanawyň iň aşagynda ýerleşdi.
Pes bahalaryň berilmeginiň sebäpleriniň biri — kompaniýalaryň aýdanlary bilen resmi maglumatlaryň çapraz gelmegi boldy. Kompaniýalar öz mahabatlarynda enjamlaryň uzak wagtlap goldanylýandygy bilen öwünýär. Ýöne EPREL bazasynda enjamlaryň programma üpjünçiliginiň täzelenme möhletiniň diňe bäş ýyldygy görkezilýär.
Şeýle hem, öndürijileriň tehnikalary özbaşdak bejermek hukugynyň giňeldilmegine garşy çykyş edýän pudaklaýyn birleşiklere gatnaşýandygy bellenilýär.
Noutbuklar segmentinde Apple «C-», Lenovo bolsa «C» bahasyny aldy. Bu ugurda Asus we Acer kompaniýalary has ýokary netijeleri görkezdi.
