Samsung Display bölümi Galaxy S26 Ultra flagmany üçin taýýarlan mahabat wideosyny köpçülige hödürledi. Bu wideoda ünsli tomaşaçylar Apple kompaniýasynyň entek tanyşdyrylmadyk iPhone 18 Pro Max smartfonynyň şekiliniň bardygyny anykladylar.
Gagadget portalynyň ýazmagyna görä, ekranyň gorag funksiýasyny (Privacy Display) görkezýän wideoda koreý kompaniýasy öz enjamyny bäsdeşiniň smartfony bilen deňeşdirýär. Şol bäsdeş enjamyň dizaýny bolsa Apple-yň geljekki smartfony baradaky iň soňky syzylyp çykan maglumatlar bilen doly gabat gelýär.
Wideonyň kadrlarynda Dynamic Island kesigi düýpli kiçeldilen we ekran ramkalary örän inçeldilen smartfon görünýär. Bu bolsa iPhone 18-iň häsiýetnamalary baradaky gürrüňleri tassyklaýar. Geň galdyrýan ýagdaý bolsa, mahabat wideosynyň dürli ýurtlar üçin dürli wersiýalarynyň bolmagydyr: Koreýa üçin taýýarlanan wideoda bäsdeşiň täze dizaýny görünýän bolsa, Malaýziýa üçin niýetlenen wersiýada öňki modelleriň adaty kesikli şekili ulanylypdyr.
Analitikleriň çykaran netijesine görä, beýle waka marketing bölüminiň ýalňyşlygy sebäpli ýüze çykyp biler. Şol bir wagtyň özünde, bu ýagdaý Apple-yň 2026-njy ýylda hakykatdan hem ekran ramkalary diýseň inçe bolan modeli hödürlejekdigi baradaky çaklanyşlary güýçlendirýär. Täze iPhone-yň resmi tanyşdyrylyşyna bolsa diňe şu ýylyň sentýabr aýynda garaşylýar.
