SpaceX kompaniýasy geçen ýyly 18,5 milliard dollar girdeji we 5 milliard dollar töweregi zyýan bilen tamamlady. Bu barada «The Information» neşirine salgylanyp, Reuters agentligi habar berdi.
Bu görkezijileriň şu ýylyň fewral aýynda SpaceX kompaniýasyna birikdirilen xAI startapynyň netijelerini hem öz içine alýandygy bellenilýär. xAI hasaba alynmadyk ýagdaýynda, kompaniýanyň düşewünt gazanmagy mümkindi.
Mundan ozal Reuters agentligi SpaceX-iň öz girdejisiniň 2025-nji ýylda 15-16 milliard dollardygyny, düşewündiniň bolsa 8 milliard dollara ýetendigini habar beripdi. Şeýlelikde, xAI startapynyň goşulmagy jemleýji maliýe netijesine täsir etdi.
Ilon Mask kompaniýalaryň birleşdirilmegine uzak möhletleýin strategiýanyň bir bölegi hökmünde garaýar. Hususan-da, söhbet xAI-yň hasaplaýyş infrastrukturasyny, şol sanda kosmos tehnologiýalaryny ulanmak arkaly ösdürmek barada barýar.
SpaceX hususy kompaniýa bolmagynda galýar, emma ol IPO (aksiýalaryny biržada ýerleşdirmek) üçin arza berdi. Kompaniýa biržada satuwa çykarylan ýagdaýynda, onuň bazar gymmaty, takmynan, 1,75 trillion dollara ýetip biler.
