Tesla kompaniýasy meşhur Model Y-den kiçi we arzan boljak täze elektrik krossowerini işläp düzmäge başlady diýip, Reuters agentligi bu ýagdaýdan habarly insaýderlere salgylanyp habar berýär.
Deslapky maglumatlara görä, täze modeliň önümçiligini Hytaýda ýola goýmak meýilleşdirilýär.
Geljekki täze modeliň uzynlygy takmynan 4,28 metr, agramy bolsa ýüksüz bir ýarym tonna bolar. Bahasyny peseltmek üçin elektrik ulagyny diňe bir hereketlendiriji we häzirki modelleriňkä garanyňda kiçi batareýa bilen enjamlaşdyrmak meýilleşdirilýär.
Şeýle krossoweriň bahasynyň 30 müň dollardan az bolmagyna garaşylýar, bu bolsa ony Tesla-nyň modelleriniň arasynda iň elýeterlisine öwrer.
Taslama häzirki wagtda başlangyç tapgyrynda we köpçülikleýin öndürilip başlanjak senesi heniz yglan edilmedi.
