NASA-nyň «Orion» kosmos gämisi «Artemis II» missiýasynyň ekipažy bilen Ýere sag-aman dolanyp geldi. Soňky 50 ýyldan gowrak wagtyň içinde ilkinji gezek adamlaryň gatnaşmagynda Aýa uçup, yzyna dolanylmagy bu wakanyň ähmiýetini juda artdyrýar.
Gämi meýilleşdirilen wagtda – Kaliforniýanyň kenarynda, Ýuwaş ummanyna gondy. Aşgabat wagty bilen bu waka şu gün –11-nji aprelde, daňdan sagat 05:08-de boldy.
«Orion» atmosferanyň dykyz gatlaklaryna sagatda 40 müň km tizlik bilen girdi. Gäminiň daşynda emele gelen plazma sebäpli 6 minutlap Ýer bilen aragatnaşyk bolmady. Ýere urulmazlyk üçin ilki haýalladyjy, soňra bolsa esasy paraşýutlar açyldy we tizlik howpsuz derejä çenli azaldyldy.
Missiýa takmynan 10 gün dowam etdi. Ekipažda jemi dört kosmonawt – Rid Waýzmen, Wiktor Glower, Kristina Koh (NASA), Jeremi Hansen (Aýa uçan ilkinji kanadaly) boldy.
Bu uçuş Aýyň ýüzüne gonman, diňe onuň töwereginden aýlanyp geçmek bilen çäklendi. Emma bu amala aşyrylan iş, NASA-nyň geljekde Aýda we hatda Marsda hem adamly bazalary gurmak meýilnamasynyň iň esasy basgançagy boldy.
Ekipaž häzir ABŞ-nyň harby-deňiz gämisine (USS John P. Murtha) ewakuasiýa edildi. Indi olar lukmançylyk barlaglaryndan geçmek üçin San-Diýego we Hýuston şäherlerine ugradylar.
