Mercedes-Benz kompaniýasy özüniň flagman elektrokary bolan EQS modeli üçin täzelemeleri tanyşdyrdy. Bu model brendiň taryhynda ruly bilen tekerleriniň arasynda mehaniki baglanyşyk bolmadyk, ýagny «sim arkaly» dolandyryş ulgamyna eýe bolan ilkinji tapgyrlaýyn awtoulag bolup biler. Şonuň netijesinde, awtoulagy adaty ruluň deregine şturwal bilen enjamlaşdyrmak meýilleşdirilýär. Onuň tanyşdyryljak wagty häzirlikçe takyklanylmaýar.
Kompaniýanyň maglumatyna görä, täze ulgam manýowr etmegi we parkowkany ýeňilleşdirer, şeýle hem rula geçýän titremeleri azaldar. Dolandyryş has ýeňil bolar, rul mehanizminiň iş kadalary bolsa hereket edilýän şertlere görä uýgunlaşar. Şunuň bilen birlikde, yzky tekerleriň 10 gradus burça çenli öwrülmek funksiýasy hem saklanar.
Şturwalyň ulanylmagy sürüjiniň öňündäki boşlugy artdyrar we enjamlar paneliniň görnüşini gowulandyrar. Awtoulaga münmek we ondan düşmek hem has oňaýly bolar. Täze gurluş üçin aýratyn howpsuzlyk ýassygy işlenip düzüldi.
«Sim arkaly» dolandyryş ulgamy goşmaça opsiýa hökmünde elýeterli bolar — alyjylar isleseler adaty klassiki ruly hem saýlap bilerler.
Habar berlişi ýaly, täze tehnologiýa bir million kilometrden gowrak synagdan geçdi.
Mundan başga-da, EQS modeli täzelenen yşyklandyryş ulgamyna we daşky dizaýnyndaky üýtgeşmelere eýe bolup biler. Salonyň içinde bolsa multimedia ulgamynyň programma üpjünçiliginiň täzelenmegine garaşylýar.
