Ilon Mask OpenAI we Microsoft kompaniýalary bilen bolýan käzyýet çekişmeleriniň çäginde, OpenAI-yň baş direktory Sem Altmanyň we prezidenti Greg Brokmanyň wezipesinden çetleşdirmek isleýär. Bu barada milliarderiniň aklawçylary habar berdiler.
Taýýarlyk işleri eýýäm başlandy, eminler toparynyň düzümi bolsa 27-nji aprelde belli bolar.
Maskyň aýtmagyna görä, ýolbaşçylar startapyň maksatnamasyna wepaly bolmadylar. Milliarder OpenAI-yň täzeden täjirçilik däl gurama derejesine gaýtarylmagyny talap edýär.
Şeýle-de milliarder kompaniýanyň ilkinji ýyllarynda goýan 38 million dollarynyň aldaw ýoly bilen elinden alandygyny öňe sürýär. Ol ChatGPT arkaly pul gazanylmagyna we kompaniýanyň täjirçilik gurluşyna öwrülmegine garşy.
Onuň aklawçylary bu ýagdaýy: «Eger şahsyýetler jemgyýetçilik guramasynyň maksadyny gorap bilmeseler, olaryň wezipesinden boşadylmagy iň giň ulanylýan kanuny usuldyr» diýip düşündirýärler. Ýöne arzaçy bular bilenem oňmaýar. Ol kadr çalşygyndan daşgary 134 milliard dollara çenli öwez tölegini we «adalatsyz gazanylan pullaryň» gaýtarylmagyny-da talap edýär.
OpenAI-yň wekilleri bu jedelli meselä Maskyň egoizmi we göripçiligi diýip baha berýärler. Olaryň pikiriçe, Mask şeýdip, bäsdeşini yza çekmek isleýär. Şundan ugur alyp, OpenAI hem kem oturmady we iki ştatyň baş prokuroryndan Maskyň özüne garşy alyp barýan işlerini derňemegi haýyş etdi.
Ilon Mask 2015-nji ýylda OpenAI-yň esaslandyryjylarynyň biri bolupdy, emma 2018-nji ýylda düşünişmezlikler sebäpli taslamadan çekildi. Soňra ol özüniň xAI startapyny esaslandyrdy we ony eýýäm X (Twitter) hem-de SpaceX bilen birleşdirip, ägirt uly tehnologiýa imperiýasyny emele getirdi.
