9-njy aprele geçilýän gije UEFA-nyň Çempionlar ligasynyň çärýek final duşuşyklary geçirildi. Ilkinji oýunlarda «Barselona» öz meýdançasynda Madridiň «Atletikosyndan» utuldy, «Pari Sen-Žermen» bolsa «Liwerpuly» ýeňlişe sezewar etdi. Iki duşuşyk hem 2:0 hasabynda tamamlandy.
Ispaniýanyň iki ägirdiniň arasyndaky oýun Barselonadaky «Kamp Nou» stadionynda geçdi.
Duşuşygyň 44-nji minutynda katalonlar meýdanda 10 bolup galdylar — VAR ulgamyna seredilenden soň, iň soňky umyt foly sebäpli «blaugrananyň» goragçysy Pau Kubarsi gyzyl kart aldy. Edil şondan soň depilen jerime urgusy bilen «Atletikonyň» oýunçylary öňe saýlandylar: Hulian Alwares (45-nji minut) topy gönümel «dokuzlykdan» urmagy başardy.
Ikinji goluny madridli topar 70-nji minutda urmagy başardy — meýdança ikinji ýarymda gadam basan Aleksander Sýorlot (70) tapawutlandy.
«Atletikonyň» tälimçisi Diego Simeone karýerasynda ilkinji gezek «Kamp Nou» stadionynda ýeňiş gazanyp gördi.
Toparlaryň jogap oýny 15-nji aprele geçilýän gije Madridde oýnalar. Iki duşuşygyň netijesi boýunça ýeňiji bolan topar ýarym finalda «Arsenal» (Angliýa) we «Sporting» (Portugaliýa) garşydaşlygynyň ýeňijisi bilen ýüzbe-ýüz bolar.
Pariźde geçirilen parallel oýunda ýaryşyň häzirki çempiony «PSŽ» özüne aşa agram salmazdan «Liwerpuldan» üstün çykdy. Gollary Dezire Due (11) we Hwiça Kwarasheliýa (65) öz adyna ýazdyrdy.
«Enfild» stadionyndaky jogap duşuşygy hem 15-nji aprele geçilýän gije oýnalar. Bu jübütden ýarym finala çykan topar «Bawariýa» — «Real Madrid» garşydaşlygynyň ýeňijisi bilen güýç synanyşmaly bolar.
Iki oýnuň hem başlangyç jürlewügi ýaňlanmanka sişenbe güni 80 ýaşynda aradan çykan Rumyniýanyň milli ýygyndysynyň öňki tälimçisi Mirça Luçeskunyň hatyrasyna bir minutlyk dymyşlyk yglan edildi.
