Meşhur aktrisa Merilin Monro degişli bolan seýrek şahsy zatlar, resminamalar we eşikler Los-Anjelesdäki täze sergide görkeziler. Bu barada Euronews habar berýär.
«Marilyn Monroe: Hollywood Icon» atly sergi 31-nji maýda Kino sungatynyň akademiki muzeýinde açylar. Bu ýerde kolleksiýaçy Braýan Jonsuň şahsy arhiwinden alnan gymmatlyklar jemlener.
Sergide tomaşaçylary gyzyklandyraýjak, prezident Kennedi bilen baglanyşykly zatlar, şeýle-de Monronyň meşhur çykyşyndan galan ýadygärlikler hödürleniler.
Olaryň arasynda aktrisanyň 1962-nji ýylyň awgustynda, aradan çykan güni gol çeken iň soňky çegi-de bar. Bu çek onuň Kaliforniýadaky täze alan jaýy üçin mebel sargytlaryna degişlidir.
Merilin Monronyň kinoda janladyrmaly keşplerine taýýarlanan wagty öňünde uzak wagtlap oturan aýnasy we 1960-njy ýyllaryň başynda iň söýgüli brendleriniň biri bolan Italiýanyň Pucci moda öýüniň lybaslary hem görkeziler.
Sergi aktrisanyň hakyky ady bolan Norma Jin Mortensonyň şahsy durmuşy bilen bütin dünýä tanyş bolan meşhur keşbiniň arasyndaky tapawudy açyp görkezmegi maksat edinýär.
