Çikago uniwersitetiniň talyplarynyň topary agyr elementleriň rekord derejede az mukdaryna eýe bolan SDSS J0715-7334 ýyldyzyny tapdylar. Bu şu wagta çenli belli bolan iň “arassa” ýyldyzdyr.
Barlagçylaryň berýän maglumatlaryna görä, ýyldyz milliardlarça ýyl mundan ozal Uly Magellan Buludynyň galosynda emele gelip, soňra Akmaýanyň Ýoly galaktikasyna göçüpdir. Ol häzir Ýerden takmynan 80 000 ýagtylyk ýyly uzaklykda ýerleşýär.
Alymlar Beýik Partlamadan soň Älemde ilkibaşda iň ýönekeý elementleriň - wodorodyň we geliýiň peýda bolandygyny düşündirýärler. Olardan ilkinji ýyldyzlar emele gelipdir. Soňra, olaryň ewolýusiýasy we partlamalary arkaly astronomlaryň metallar diýip atlandyrýan has agyr elementleri peýda bolupdyr.
"Astronomlaryň Älemdäki metallar diýip atlandyrýan ähli has agyr elementleri ýyldyzlaryň içinde termoýadro reaksiýalaryndan başlap, has täze partlamalaryna we örän dykyz ýyldyzlaryň çaknyşmalaryna çenli ýyldyz prosesleri netijesinde emele gelipdir" - diýip, Çikago uniwersitetiniň professory Aleks Ji aýdýar.
SDSS J0715-7334-iň düzüminde Günde tapylan metallaryň diňe 0,005% -iniň bardygy anyklandy. Bu öňki rekord eýesindäki metallaryň mukdaryndan iki esseden hem gowrak az.
Bu ylmy barlagyň netijeleri Nature Astronomy žurnalynda çap edildi.
