ChatGPT ulgamynda "AccuWeather" goşundysy elýeterli boldy, onuň kömegi bilen ulanyjylar on güne çenli bolan howa çaklamasyny alyp bilerler.
Bu funksiýadan peýdalanmak üçin hyzmaty öz ChatGPT profiliňize birikdirmeli. Şondan soňra dialog penjiresinde @ simwolynyň üsti bilen "AccuWeather" hyzmatyny saýlap, sorag bermek mümkindir. Bu hyzmat islendik ýerdäki häzirki howa ýagdaýy, şeýle hem ýakyn günler üçin temperatura, ýagyn, şemal we beýleki görkezijiler barada maglumat berýär.
Maglumatlaryň takyklygyny ýokarlandyrmak üçin sebitiň taryhy maglumatlaryndan we resmi duýduryşlardan peýdalanylýandygy bellenilýär.
Mundan ozal OpenAI kompaniýasynyň ChatGPT-ni, programlaşdyrmak üçin niýetlenen "Codex AI" guralyny we emeli aň esasyndaky "Atlas" brauzerini özünde jemleýän täze "super-goşundynyň" üstünde işleýändigi habar berlipdi.
Mart aýynda kompaniýa özüniň öňdebaryjy modeliniň iki sany ykjam görnüşini — GPT-5.4 mini we GPT-5.4 nano modellerini hem tanyşdyrdy. Olar programlaşdyrmaga kömek etmek, şekiller bilen işlemek we multimodal goşundylar ýaly has çalt hem-de tygşytly wezipeleri ýerine ýetirmek üçin niýetlenendir.
