Google kompaniýasy Play Market-de teswirler boýunça gözleg funksiýasyny hödürledi. Bu funksiýa ulanyja ýüklemek isleýän goşundysy barada özüni gyzyklandyrýan soraga jogap tapmak üçin birtopar teswirleri dörüp, wagt ýitirmezlige mümkinçilik berýär.
«Android Authority» neşiriniň habar bermegine görä, geçen ýylyň noýabr aýynda žurnalistler bu funksiýanyň synagdan geçirilýändigini aýdypdy, ýöne şol wagt ony işledip bolmady. Google ýakynda agzalan funksiýanyň Play Store dükanynyň täzelenmesi bilen işe girizilendigini tassyklady.
Täze funksiýany ulanmak üçin islendik goşundynyň ýokarky bölegindäki reýtinge, soňra «Ähli teswirleri görkez» (Посмотреть все отзывы) düwmesine basmaly. Ondan soň «Teswirler we reýtingler» bölümine çenli aşak süýşürmeli. Emeli aň tarapyndan taýýarlanan gysgaça maglumatyň edil aşagynda lupanyň şekiljigi görner. Oňa basylanda, teswirler bölümi ekranyň ýokarsyna süýşer we gözleg setiri peýda bolar.
Gözleg setirine programma üpjünçiliginiň zerur häsiýetlerini ýazyp, girizmek düwmesine basanyňyzdan soň, ulanyjyny gyzyklandyrýan sözleri öz içine alýan teswirler peýda bolar.
Häzirki wagtda teswirler ýazylan pursatynda derrew görünmeýär we bu funksiýa diňe gözleg soragyna laýyk gelýän teswirleri tapmaga mümkinçilik berýär. Şeýle hem, ulanyjy häzirlikçe gözleg setiriniň aşagyndaky diňe meşhur mowzuklar üçin niýetlenen kömekçi sözleri ulanyp bilýär. Ýene bir çäklendirme, netijeler diňe birje söz ýazylanda görünmeýär, ýagny soragda hökman birnäçe sözi ulanmak gerek.
Play Store-daky bu gözleg funksiýasyndan peýdalanmak üçin goşundyny 50.7.24-31 wersiýasyna çenli täzelemeli.
