Hytaýly biotehnologlar garaňkyda öz-özünden ýagtylyk saçýan, genetiki taýdan üýtgedilen täze ösümlikleri tanyşdyrdylar. Futurism neşiriniň ýazmagyna görä, bu täsin oýlap tapyş elektrik energiýasyny ulanmazdan, seýilgähleri we syýahatçylyk zolaklaryny yşyklandyrmaga mümkinçilik berer.
Alymlar ösümlikleriň öýjüklerine şöhle saçýan mör-möjekleriň (ýaldyrawuk tomzaklaryň) we ýagtylyk berýän kömelekleriň genlerini ýerleşdirdiler.
Bu tehnologiýa eýýäm günbakar, orhideýa we hrizantema ýaly jemi 20-den gowrak görnüşde şowly synag edildi.
«Garaňkyda öz-özünden lowurdap duran ösümliklerden doly jülgäni görenler, hakyt «Awatar» kinosyndaky dünýä Ýerde peýda boldumyka öýderler» diýip, kompaniýany esaslandyryjy Li Ženhan bu taslamanyň amala aşan ýagdaýyndan soňky görnüşi hakda süýjedip düşündirýär.
Täze tebigy tehnologiýada genetiki hem metal bölejiklerini ornaşdyrmak usuly ulanylar. Birinjide ösümligiň özi ýagtylyk öndürer, oňa diňe suw we dökün berseň, bolany. Ikinjide bolsa, ýapraklaryň içine ýörite metal (stronsiý we alýuminiý) bölejikleri ýerleşdiriler. Olar gündizine Günüň energiýasyny toplap, gijesine bolsa ony yşyk görnüşinde yzyna goýbererler. Şeýle-de, bu usulda ýagtylygyň reňkini hem üýtgedip bolar.
Bu ösümlikler elektrik energiýasyny tygşytlamaga we şäherleriň ekologiýasyny gowulandyrmaga kömek eder. Olar adaty çyralaryň ýerini tutup biljek özbaşdak we tebigy yşyklandyryş usulydyr.
