Orion kosmos gämisiniň ekipažy Ýerden 406,773 kilometr uzaklyga uçup, adamzadyň täze rekordyny goýdy diýip, NASA-nyň ýolbaşçysy Jared Aýzekmanyň sözlerine salgylanýan Bloomberg agentligi habar berýär.
Bu aralyk 1970-nji ýylda Apollo 13 missiýasy tarapyndan geçilen taryhy aralykdan 6000 kilometrden gowrak uzakdyr.
Gämi Aýyň arkasyndan uçup geçýän wagty taryhy sepgit geçildi. NASA bu wakany degişme arkaly belledi: Ýerden ekipaža elektron hat iberildi we bu hat häzirki pursatdan başlap, taryhdaky iň uzak aralyga iberilen şahsy hat bolup durýar. Aýyň daşyndan aýlanýan wagty Orion Aýyň aňyrsyna geçip gözden ýitdi; gämi bilen aragatnaşyk wagtlaýynça kesildi.
Aşgabat wagty bilen sagat 04:25-de, ekipažyň nukdaýnazaryndan Aýyň üstünde «Ýeriň dogmagy» başlandy. Sagat 04:25-de Uçuşlary dolandyryş merkezi kosmonawtlar bilen aragatnaşygy dikeltdi. Şol wagtyň dowamynda kosmonawtlar Aýa gözegçilik etdiler. Missiýanyň bu möhüm tapgyry tamamlanandan soň, gämi yzyna — Ýere tarap ugrady.
Artemis II ekipažynyň düzüminde NASA-nyň kosmonawtlary Rid Waýzman, Kristina Kuk we Wiktor Glower, şeýle hem Kanadanyň kosmos agentliginiň (CSA) wekili Jeremi Hansen bar. SLS raketa-göterijisi 2026-njy ýylyň 2-nji aprelinde NASA-nyň Floridadaky Kennedi adyndaky kosmos merkezinden uçuryldy.
Kosmos gämisi Aýyň üstünden takmynan 8000 kilometr aradaşlykda, orbita girmezden aýlanyp geçer. Bu manýowry tamamlandan soň, ekipaž Ýere gaýdyp geler. Ekspedisiýanyň umumy dowamlylygy 10 güne barabar bolar, bu bolsa 1972-nji ýylda "Apollon" programmasy tamamlanandan bäri uzak kosmosy öwrenmekde iň möhüm tapgyr bolar.
