Samsung kompaniýasy özüniň Samsung Messages goşundysynyň işini bes edýändigi barada habar berdi. Bellenilişi ýaly, bu hyzmat şu ýylyň iýul aýyndan başlap elýeterli bolmaz. Ulanyjylara habar alyşmak üçin esasy gural hökmünde Google Messages goşundysyna geçmek maslahat berilýär.
Geçişden soň ulanyjylar media faýllaryny ýokary hilde ibermegi, toparlaýyn çatlary we hatyň ýazylýandygyny görkezýän indikatorlary göz öňünde tutýan RCS standartyna eýe bolar. Şeýle hem smartfonlaryň, planşetleriň we akylly sagatlaryň arasynda hat alyşmalaryň sinhronizasiýasy elýeterli bolar.
Google Messages goşundysyna Gemini emeli aňynyň mümkinçilikleri goşuldy, olar gönüden-göni çatlaryň içinde kontent bilen işlemäge şert döredýär. Şol bir wagtyň özünde, şahsylaşdyrma funksiýalarynyň käbiri täze goşundyda bolmaz.
Kompaniýa soňky ýyllaryň dowamynda kem-kemden öz messenjerinden ýüz öwürdi. Galaxy Fold 6 we Flip 6 modellerinden, şeýle hem Galaxy S25 hataryndan başlap, enjamlarda Google Messages esasy goşundy hökmünde oturdyldy. Samsung Messages häzirlikçe Galaxy Store dükanynda elýeterli bolmagynda galýar, onuň doly öçüriljek wagty barada goşmaça habar berler.
