Dagystanda bir hepdäniň içinde ikinji gezek uly göwrümli suw joşguny boldy. Bu gezekki weýrançylyklaryň netijeleri has-da agyr boldy.
Tebigy apatyň mart aýynyň ahyryndaky birinji zyýany on müňlerçe ýaşaýjyny elektrik energiýasyz galdyrypdy, 800-den gowrak öýi suw basypdy, awtomobil ýollarynda gatnawlary kesip, demir ýol geçelgelerine zeper ýetiripdi. 4-nji we 5-nji apreldäki täze güýçli ýagyşlar weýrançylygyň nobatdaky tapgyryna sebäp boldy.
Suw akymlary Mahaçkala, Derbent, Hasawýurt, Dagystan Otlary we beýleki ilatly nokatlaryň köçelerini basdy. Respublikanyň paýtagtynda adatdan daşary ýagdaý yglan edildi, 140-a golaý oba çyrasyz galdy, demir ýol gatnawy we suw arassalaýjy desgalaryň işi bozuldy, federal ýoluň üstüne sil akymlary geldi.
Güýçli ýagyşlar zerarly dörän suw joşguny netijesinde Mahaçkaladaky üç gatly jaýyň düýbi opurylyp, bina ýykyldy. Onuň golaýyndaky ýene-de dört sany köp öýli ýaşaýyş jaýy gabaldy — hünärmenler täze ýumrulmalaryň bolup biljekdigini duýdurýar. 300-e golaý ýaşaýjy ewakuasiýa edildi: olaryň bir bölegi wagtlaýyn nokatlarda ýerleşdirildi, beýlekileri bolsa wagtlaýynça garyndaşlarynyňka göçdi.
Hasawýurtda bolsa suw Ýaryk-su derýasynyň üstünde ýerleşýän ygtyýarlandyrylmadyk bazary syryp äkitdi. Ýerli ýaşaýjylaryň sosial ulgamlarda paýlaşýan wideolarynda akymyň halylary, matalary we hatda hojalyk tehnikalaryny hem akdyryp barýandygyny görmek bolýar. Şeýle-de, Balýurt obasyna suw basmak howpy abanýar.
